الجمعة

حق ليا و حق ليك

انت فاهم ولا لاء
اللي ضايع مني حق
حقي فيك حقي اكون
صورة واحدة في العيون
حقي ف ان اللي مابينا
يبقى بينا مش مشاع
حقي احساس الامان
اللي عمره ف يوم ما ضاع
المكان اللي جمعنا
يوم ما خدنا الصورة دي
و المكان اللي اشترينا
و المكان اللي كلنا فيه
و لا فاكر يوم ما شوفتك
كنت لابس يومها ايه
ولا اول ضحكة ليا
لسه فاكر ضحكت ليه
كل ذكرى حقي فيك
حق ليا و حق ليك
كل شبر ف يوم جمعنا
كان صغير ولا شيك
حق لينا يكون مابينا
بينا بس مهما كبرنا
احنا شركتنا ف مصيرنا
ف ارجوك تحافظ ع الشريك

اماني

حتى القلم مبقاش يطيق السطر
زي الكلام هربان من التدوين
و الشعر بقى اعرج .. ناقص شطر
كل الحروف محبوسة في الزنازين

قفلت ببان الوصف و الشبابيك
والرسم و الكراس تابوا مع التلوين
ياللي الجمال رافض يكون غير ليك
حتى الزهور رحلت عن البساتين

الحب امنيه حولها العشق لاماني
و ازاي اعشق جمال خلى العقول مجانين
كل الحكاية ملاك و اغواني
رفعتني فوق السما .. و اتعدلت الموازين

يا اماني مديون لك بعفة نفس
و بسعد عوضني اما كنت حزين
انا كان سؤالي ازاي هاتوب في الامس
ازاي هداري ذنوب عملتها ف سنين

جه جمال روحك .. وجهني للمولى
اخلاقك .. اللي رجعلي حنين
لزمان .. قبل اما اقول اولى
اعيش وحدي .. و لا اكون من العاشقين