الأربعاء

اضحك

الشمس كل يوم تطلع
تنده تقول
اضحك يا انسان
عمرك يطول
افرح ياانسان
وارمي الحمول
على الخالق الواحد
لو بس تلجاله
همك يزول
وفي يوم مطلعتش الشمس
وبدا بين العباد الهمس
وبدا العبوس على الوشوش يترسم
علشان مسمعوش الكلام امس
مضحكوش مفرحوش
كانوا مفكرين ان العيب في الوشوش
واحد له وش بيضحك وواحد ملوش
من رميهم الحمول على بعض معرفوش
ان وش الضحك محدش مخدوش
بس فيه اللي بيعرف يشغله
واللي بيكسل وميشغلوش
ولو تطلع الشمس تاني
هتنادي وتقول
يا انسان
اضحك
عمرك يطول
افرح
ارمي الحمول
على الخالق الواحد
لو بس تلجاله
همك يزول
دا انت في الاخر
طلعت عبد ضعيف مشلول
مش عارف حتى تضحك
و كاره تكون ملول

الأحد

ثواني عدت عليا

السنين
حبة ثواني متجمعين
على الحلوة عل المرة
ثواني مكبوتة
وثواني حرة
ثواني ضحكت فيها وثواني بكيت
وثواني صرخت صرخة تشق الحيط
وثواني عدت عليا ثواني
وثواني عدت ساعات
وثواني عدت سنين
وثواني خدني الحنين
للماضي للي فات
خدني الحنين للحلو من الذكريات
وثواني اشوف اللي جاي في عيون الصبايا
وثواني احس اني طفل
محتاج اسمع حكايه
وفي وسط كل الثواني
لاقيتها
ثانيه مستنيها
وياما حلمت بيها
ثانيه
لاقيت فيها الحبيب
ثانيه
غير كل الثواني
حستني فيها حد تاني
ثانية خدتني من زماني
ثانيه مالياها الاماني
وفي ثانية
راحت من بين ايديا كل الثواني
وراحت الثانيه اللي كنت مستنيها
راحت الثانيه اللي يا ماحلمت بيها
راح الحبيب من بين ايديا
في اصعب ثانية عدت عليا
لكنها في النهاية ثانية
وعدت
ودخلت في كتاب السنين
زيها زي الثواني التانين
يمكن تكون اصعب
يمكن تسيب ذكرى
بس احسن
نستنى الثواني الجايين