عيش

الوشوش محتاجة للتغير
النفس محتاجة لحسن التعبير
وشوية عقل في التفكير
و رجوع للحياة
الحياة الجميلة
اللي سودناها بكلامنا الممل
اللي فاكرينه كلام كبير
كلام عن الضمير
عن اللي باع واشترى
عن اللي ظلم وافترى
كلام عن المصير
مصير الناس
ونسيت نفسك
فقدت الاحساس
احساس الفرح
احساس البهجه
من السواد اللي في تفكيرك وكلامك
من السد اللي بنيته في الطريق قدامك
من الاعتماد على الغير في تنفيذ احلامك
جرب تسكت متكلمش الا لنفسك وعن نفسك
جرب تشوف غدك وتتعلم من امسك
جرب تحقق حلمك بايدك
جرب ولو فشلت اكيد الفشل هايفيدك
ولو عن البلد اكيد لو بقيت ناجح و مفيد
هاتقدر تخدمها لو عايز كما تريد
ولو عايز تتكلم وتكتب
وجّه فكرك في طريق ملون
بلاش تشحن وخلي كلامك على الناس يهوّن
معاك حق ان في ظالم ومفتري وحرامي
بس شوف بقالك قد ايه بتتكلم كلام حامي
وبرضه لسه في ظالم و مفتري وحرامي
علشان هي دي سنة الحياة
في الخير وفي الشر
في اللي فاد وفي اللي ضر
ركز مع نفسك وحاول تفيد
وتستفيد
حاول تكون
بطل تبص بس جوه العيون
بص على الانسان ككل
هتلاقي نصة هباب ونصه التاني فل
الدنيا كلها كده
نصين
حاول بقى تخلي نصك الهباب فل
وبطل تروح برجلك لحارة الندم والذل