السبت

رساله من مصر لمصر


على فين يا بلدي الخطاوي
لفين هاتروحي
لابسالنا اسود ليه
و قاعده تنوحي
طب ليه ساكته ليه
ومش راضيه ليه بسرك تبوحي
اتكلمي
ليه الكلام عملوه
جاوبي على سؤال
ولادك بيسألوه
ليه الطعام غلوه
ليه الكلام منعوه
ليه المرض جلبوه
ليه العلم داروه
ليه الحرام حلوه
ليه الحق كتموه
ليه الحرامي سابوه
والمظلوم سجنوه
ليه كل شبر في ارضك يا بلدي ليهم خدوه
و ليه انتي ساكته
و مشدود لجامك
و كل اما ننطق
يقولوا سلامك
و امنك القومي
مين غيرنا اصلا يساعدك تقاومي
سيوف راشقه فيك و من كل جانب
و برده يبقّوا علينا الاجانب
يبقّوا اللي راشق فيك السيوف
و يضرب و يسجن كل اللي صانك
امتى عساكرك هاتقدر تشوف
هاتقدر تميز مابين اللي خانك
و بين اللي ماشي بحقه يطالب
هو انت ابن موسى وانا ابن فرعون
انا زي زيك وليا مطالب
لا عمري كرهت بلدي ولا اقدر اخون
و املي اكون ايجابي بدل ما ابقى سالب
بدل ما امشي منك و اسيبك تقاسي
و اصبح لاسمك كاره و ناسي
و اخد معايا علمي و فاسي
غيرك يشوفني يبَوّسلي راسي
يطبطب و يبقالي اهلي و ناسي
ياخد مني علمي و بيه يستفيد
لنفسه لابنه حتى لحفيد
و متفكريش اني هابقى سعيد
وانا ماشي منك و عنك بعيد
ياريتك يا بلدي تفهمي الكلام
لاني زهقت و مش راح اعيد
مش راح اقول الكلام مره تانيه
ياريتك يا ريس تفكر فينا ثانيه
دا احنا برضه شعب محناش عبيد
و البلد بلدنا رضيت ام لم رضيت

هناك 16 تعليقًا:

جايدا العزيزي يقول...

ياسلام يا احمد على مصر

اللى دايما وجعه قلبى وقلبك

بنحبها اوووووووى

وكل حرف فى كلامك بيعلنها

انت الوحيد الذى اعشق حروفه

حينما تكون لمصر

رائعه الخاطرة

وكل عام وانت طيب وبخير

وعقبال 100 سته

سامحنى مش بحب الفيس بوك

لكن حبيت اهنيك فى منبرك

تحياتى

Amr Awwad يقول...

بجد يا احمد بتطلع اللى جوه الواحد
الكلام بيعبر عن اللى فى نفسنا
بس تقول ايه هما اللى حاكمين على رقبة مصر هما اللى مخلينها كده , ومخلينها معذبة ولادها ..
ربنا يرحمنا ويرحم مصر منهم

Unknown يقول...

اختي جايدا
لك كل الشكر على تنائك المشجع

و على رأي ام كلثوم
مصر التي في خاطري و في فمي
احبها من كل روحي و دمي

انا ابحث عن مصر التي في خاطري
و في خيالي
و اعتقد انها في خيال كل من يحب هذه البلد دون ادنى مصلحة

لي فقط ملحوظة بسيطة اختي :)
قد يكون هناك تشابهه في الاسماء بيني و بين شخص اخر
اعتقد ان هنا سوء تفاهم بسيط اختي
انا يوم مولدي 14-2 و اعتقد ان التهنئة تخص شخصا يوم مولده يوافق هذه الايام
فلك كل الشكر على التهنئة حتى و ان كانت لشخص اخر :):)

و لك كل الشكر سيدتي
و جزاك الله خيرا
:):)

Unknown يقول...

صديقي عمرو

لك كل الشكر على المرور و المشاركة التي اعلم انها من صمصم قلبك
فانت ممن يحب هذه البلد و يحاول جاهدا فهم الحقائق و سردها

و موضوعك الذي تحدث عن الفتن الطائفيه كان اكثر من رائع و اعجبني جدا

دمت بخير
و جزاك الله خيرا :)

Mona space يقول...

ليه الطعام غلوه
ليه الكلام منعوه
ليه المرض جلبوه
ليه العلم داروه
ليه الحرام حلوه
ليه الحق كتموه
ليه الحرامي سابوه
والمظلوم سجنوه

الكلام موجوع اوى وعميق اوى
شكرا على الرساله :)

حرّة من البلاد..! يقول...

أخي أحمد
كلماتك تدل على صدق مشاعرك تجاه بلدك
وأيضا هذا حالنا ككل في الوطن العربي بشكل عام فالكل مقهور ومظلوم وموجوع من الحالة التي وصلنا لها من الذل والعبودية والتبعية والاحتلال ومشاكل لا تنتهي .
أحييك وأحيي قلمك ودمت بعز

Unknown يقول...

شخابيط

لك الشكر على المرور و التعليق

جزاك الله خيرا

Unknown يقول...

اختي حرة من البلاد

صدقتي فهذا حالنا ككل
و ازيد عليك انني لا افرق بين عربي ايضا و غير عربي
فان القهر واقع على كل العالم بسبب بعدهم عن الله

اغاثنا الله ووفقنا لما فيه الخير

و اجاركم في مصيبتكم اعاننا الله عليها

لك كل الشكر اختي
و جزاك الله خيرا
اسعدني تواجدك :)

جنون عـبقري يقول...

جميل جدا .. وفي اعتقادي أن الحق كتموه .. لأنهم ما قدروش يدوقوا حلاوته !!!

سلمت الأنامل

الحياة الطيبة يقول...

كلمات موجعة لكنها تصف واقع الحال والصورة التي رسمتها تدل على خيال خصب ,صورت مصر كامرأة متشحة بالسواد وصامته صابره مجروحه وكيف أنها لا تملك أمرها ....وصورت حجم الغضب والحب الذي ملأ الصدر ....قد أبدعت أحمد Zemaنتطلع لجديدك .

Unknown يقول...

جنون عبقري

لك كل الشكر على المشاركة و الاضافه

فعلا مجربوش حلاوة الحق :)

جزاك الله خيرا :)

Unknown يقول...

اختي الحياة الطيبة

اسعدني تواجدك و مشاركتك احزاننا
و مهما صار الوطن قاسيا على ابنائه
سيظل وطننا و سنظل ابنائه

و سنظل نأمل ان تسنح لنا فرصة لتغير الواقع و المرور بهذا الوطن نحو الافضل

جزاك الله خيرا اختي :) 

Emtiaz Zourob يقول...

كلام رائع عن بلد اكثر من رائع
" حبيبتي مصر ، حبيبة كل العرب "
ربنا يحميها ويحفظها يا رب

Unknown يقول...

قلم و دفتر

شرفني تواجدك في بيتك

لك الشكر و الامتنان على تعليقك الجميل

جزاك الله خيرا :)

محمد أبووردة يقول...

استاذ احمد
بجد
الله يسامحك
وجعت قلوبنا بكلامك

----------------------------
نور الدرب
مدونة قلم حر
www.freeqalaam.blogspot.cpm

Unknown يقول...

استاذ نور الدرب

المشكلة تكمن في ان دي الحقيقة للاسف

ربنا يزيح عننا

شكرا لمرورك اخي