الأحد

قضية شعب


قام الشعب
يسقط نظام
يسقط ظلم
يسقط فساد
قام الشعب بعد السكات
و قامت مصر ام البلاد
ام الولاد
اللي عايش و اللي مات
اللي ضحى و اللي ثار
اللي خلى الظلم غار
اللي خلى الليل يروح
لجل ما نشوف النهار

قامت الثورة الجديده
قالت الجمله المفيده
الشعب يريد الانتقام
م اللي خلانا عل الحديده
م اللي خلى الظلم عادة
م اللي خلى القوت عبادة
م اللي خلى الحلم يصغر
يبقى يادوب لحظة سعادة

قامت يا مصري
و انت قوم
ابقى راجل في اللزوم
قوم و دافع
قوم و كافح
قوم و عمر
دا اللي قبلك كان مدمر
كل صاحي
كل واعي
خلى الخوف يخش في قلب كل راعي
قوم و فكر
قوم و قرر
قوم و نور
دا انت طول عمرك مناره
دا اللي قبلك عملوا من الحجر حضارة
قوم بعلمك
ويا حلمك
و انسى كل كلمة خايبة
تقول دا حظ و مش شطارة

يلا ننسى المحسوبية
و الجشع و الاكرامية
يلا نطلب حق ضايع
اسمة كلمة الحق القوية
يلا ننسى فن هابط
كان يقولك دا حرية
يلا نبدأ من جديد
نعرف معنى المسئوليه
يلا نبني ايد في ايد
و تبقى هي دي القضية


هناك 5 تعليقات:

TIMMY !! يقول...

السؤال هو هل الشعب قام بكامل قواه العقلية

و لا سمع الهيصه فقام يزعق و مش عارف هو فيه إيه بالظبط

و مش عارف المفروض يعمل إيه ؟؟

و هينام تاني و يزهق و لا لأ ؟؟

Unknown يقول...

كنت لسه بتناقش في النقطة دي مع احد الاصدقاء
فكان يعلق على نضوج الناس الفكري لددرجة انهم لم يعودوا يستمعوا لاغاني هابطه او يتابعوا مباريات الاهلي و الزمالك

فكان ردي انهم لم يفعلوا ذلك لانهم امنوا انه كان خطأ و تغيب عقلي
و لكن لان السياسة فرضت وجودها على الساحة لان فهم عبارة عن 80 مليون سياسسي
زي مكانوا قبل كده 80 مليون مدير فني و لعيب كورة
و ما ان تنتهي القصة السياسة هذا ان انتهت على خير ان شاء الله
سوف يعودون تدريجا لما كانوا من قبل يفعلون
الا لو انهم تداركوا انفسهم و بدء كل منهم يبني توجه فكري خاص به
ة هذا ما لا اراه فانهم مازالوا يتبعون كل ما يلقى اليهم دون تفكير
يأخذون ما يخدم توجههم السطحي و يلقون كل ما يضر به
بل و يبحثون عن ثغرات و خبايا و تلفيقات لمن يعارض افكارهم

أصالة يقول...

الكلمات راااااااائعة

Unknown يقول...

شكراا اصالة
شرفت بزيارتك :)

رودى يقول...

مع الاسف كان نفسي نكون دلوقتى بالحماسة اللى انت كتبها ديه و اظن انها بعد ما خلعنا مبارك بس كل الاحلام قربت تموت بموت شبابنا و عدم نجاح الثورة حتى الان