السبت

زيهم .. زيك .. زينا


فتح عيونك
ابدأ يومك
اشرب حاجة تصحصحك
او كلم حبيبك في تليفونك
او صلي ركعتين يغسلوا همومك
و البس هدومك
على الشغل نازل
او على دراستك تحصل علومك
نازل على الحياة
تحقق فيها حلمك بعومك
لكن و انت بتعمل كل ده افتكر
افتكر انهم كانوا زيك .. و زينا
كان برده ليهم حلم بيدعوا بيه ربنا
بس الموت اخدهم مننا .. من وسطنا
افتكر .. و خلى الكلام في معلومك
متنساش انك لسه عايش
و هما تحت التراب
متنساش ان لسه عندك فرص
تشتغل و تتفسح و تتجوز و تلبس و تفرح
و هما فرصتهم بس رحمة ربنا في الحساب
متنساش انكهم شاركوك نفس القضية
لكنهم ماتوا .. و لسه العدل غياب
متنساش ان الكل قتلهم
و لسه القتله احرار .. بدون عقاب
لسه القتلة احرار
و احنا اللي في الزنازين
سجون الحرية مليانة
م الضي محرومين
بس ارجع و اقول زيهم
زي اللي ماتوا كلهم
احنا اللي في التحرير
ذلناكم
احنا اللي في التحرير
نكسناكم
افتكروا لو ناسيين
و افتكر كمان انت .. لو كنت ناسي
انهم زيك .. كان نفسهم وطن حر
مش سلطة و كراسي
افتكر .. و خلى الكلام في معلومك
لو كنت مكانهم و هما مكانك
كانوا هايكملوا الحلم
و هاينزلوا الميدان علشانك
و لا حد كان فيهم ابدا في يوم هايلومك
يلاا .. انزل على يومك
او ادفن راسك زي النعامة
و كمل في العسل نومك

هناك 11 تعليقًا:

رودى يقول...

جميلة اوي يا اجمل شاعر، فيها اصرار على متابعة الثورة و الثورة على الظلم و حروب الكراسي، احييك اوى عليها يا باشا و ياريت تنزلها على الفيس و تعمل تاج لكل الناس يمكن النايم منهم يصحى

Ahmed Mustafa - zema يقول...

تسلمي يا اجمل حاجة في مصر .. بما انك هاتحاولي تدوري على الحاجة الحلوة اللي فيها :)))
و هي فعلا موجودة على الفيس بس مش معمول عليها تاج لحد ... لان الصاحي هايشوفها لوحده و النايم مش هايشوفها حتى لو صدفة

رودي يقول...

ميرسي يا باشا على كلامك الحلو ، بس انت بتكلم النايم مش الصاحي، الصاحي مش محتاج كلام يفوقوا لكن النايم عايز بولدوزر

Ahmed Mustafa - zema يقول...

هههههههههههههههههههههههه حلوة عايز بلدوزر دي يا رودي
على العموم زي ما اتفقنا ... هانحاول :))

Ro0o0dy يقول...

:)))))))))))))))))))))))))

روعه النسيان يقول...

احنا بننسى وفيه نغمه ال ايه مش اى حد يتكلم على الشهدا
زهقت من الفلول
الله يرحم الشهداء ويصبر المصابين

Tarkieb يقول...

شديد

Ahmed Mustafa - zema يقول...

روعة النسيان
الشهداء مش محتاجين حد يتكلم عليهم و لا يزايد عليهم علشان هما احسن مننا مليون مرة

شكرا للمرور الطيب :)) و ان شاء الله يا نعدلهعا يا نحصلهم

Ahmed Mustafa - zema يقول...

تركيب
تسلم :))

zizi يقول...

أحمد ابني العزيز ..أنت صحيح بتثبت إنك مش قلم رصاص انت رصاصة بتجري ومتصوبة ناحية كل واحد فاكر إن الناس حاتنسى ولادها ومين اللي ينسى الأم اللي فقدت زهرة الشباب والا الأب اللي فقد سنده في دنيته والا البنت اللي فقدت حبيبها والا الطفل اللي فقد أبوه والا مصر اللي فقدت حفنة من خيرة شبابها والدليل على كده انهم ضحوا بأرواحهم عشانها ..صعب صعب صعب يا أحمد ..الدم لسه مانشفش من على الأسفلت ولاعمره حاينشف طول ما القتلة عايشين آمنين وطول ما القضايا مؤجلة لحد ماحد يموت يا الملك يا جحا يا الحمار..ياترى مين فيهم بقى اللي حايموت الأول ؟؟؟؟؟؟الله أعلم ..

Ahmed Mustafa - zema يقول...

سيدتي الفاضلة - ماما زيزي
بعد كلامك لا يصح الكلام .. فانت ام و تعرفين اكثر مني معنى فقدان الابن و الشاب .. و قد يكون قدرنا كشباب ان نموت و يموت اصدقائنا امام اعيناا في سن هو المفروض سن حيوتنا و نشاطنا و بداية رحلتنا في حياتة ابت ان نبدأ الرحلة فيها ... لا اضيف على كلامك فقد قلت كل ما يجب ان يقال .. و لكن ساردد و رائك ان الدم لن يجف طالما ان القاتل لازال حرا ... و ان الثورة لن تصمت طالما ان العدل مازال في طيات الغياب

سعدت جدا بمرورك و كلامتك سيدتي الفاضلة .. تقبلي وافر احترامي و تقديري لك :)
جزاك الله خيرا